يصوم ويُصلي ولكن .. لن يَدخُل الجنة !!!

لعنة في الدنيا والآخرة ..
وطمس للبصيرة ..
ونزع البركة من الرزق ..
تحرم عليه الجنة ..
وإنقطاع للأثر .. يعني اللي يعملها ما يبقاش له أثر طيب وذكري طيبة بعد موته !
والصدمة بقي : إن كتير مننا بيقع فيها .. !

عايز تعرف ببساطة كدا هي إيه ؟!

قال الله تعالى :
" فَهَلْ عَسَيْتُمْ إِن تَوَلَّيْتُمْ أَن تُفْسِدُوا فِي الْأَرْضِ وَتُقَطِّعُوا أَرْحَامَكُمْ أُوْلَئِكَ الَّذِينَ لَعَنَهُمُ اللَّهُ فَأَصَمَّهُمْ وَأَعْمَى أَبْصَارَهُمْ " #محمد

قطيعة الأرحام !!
ولأن قطع الأرحام ظُلم ولا يختلف عن الإفساد في الأرض .. وكما معلوم أن ربنا وضع قانون " كما تَدين تُدان " .. فقاطع الرحم ربنا يعجله بعقوبته في الدنيا وكمان له عقاب في الآخرة !!!
قال رسول الله صلي الله عليه وسلم مُحذراً :
"ما من ذنب أجدر أن يُعجل الله لصاحبه بالعقوبة في الدنيا مع ما يدخر له في الآخرة من البغي وقطيعة الرحم" .

علي المقابل اللي بيصل رحمه لازم يكون له ثواب بردو في الدنيا والآخرة ..
منها : أن صلة الرحم سبب في دخول الجنة .. !
يُروي رجلا قال يا رسول الله أخبرني بعمل يدخلني الجنة فقال رسول الله صلى الله عليه وسلم: « تعبد الله لا تشرك به شيئا وتقيم الصلاة وتؤتي الزكاة وتصل الرحم» رواه البخاري ومسلم.

وقال رسول الله - صلي الله عليه وسلم - مرغباً فيما عند الله لواصلي الأرحام :
" من أراد أن يُبسط له في رزقه ويُنسأ له في أثره فليصِل رحمه " !
صلة الرحم سبب في زيادة الرزق .. وطول العمر .. أو بمعني أخر البركة في الرزق والبركة في العمر .. وبركة العمر ليها أشكال كتير زي مثلاً واحد يعيش 30 سنة يعمل فيهم أعمال عند الله أكبر وأعظم من واحد عاش 70 سنة !

ماشي كل الكلام دا تمام ..
بس في مشكلة ..
إيه هي ؟!
ازاي أسأل علي حد مش بيسأل عليا ؟!
وتقريباً دي المشكلة اللي بتبقي السبب في إنهاء العلاقات الإنسانية ..
بس إسمع حديث النبي صلي الله عليه وسلم ، قال :
" ليس الواصِل بالمُكافئ ولكن الواصل إذا قُطعت رحمه وصلها " !

لما تستني سؤالهم عشان تسأل إنت كمان عليهم وتودهم .. يبقي انت كدا مش بتصل رحمك إنت بتكافئهم علي سؤالهم عليك .. الفكرة في إنك تتحمل صبرك علي هجرهم وقطيعتهم وتصلهم انت لوجه الله مش منتظر إنهم يردوا المعاملة بالمثل " والّّذين يَصِلون ما أمَر الله بهِ أن يوصَل ويَخشونَ ربَهُم ويخَافوُن سُوءَ الحِساب " #الرعد !

يارب تكون وصلت .. وربنا ما يجعلنا وإياكم أبداً من قاطعي الأرحام !
:)