الحب موجود فى كل حاجه حوالينا !

الحب موجود فى كل حاجه حوالينا :)

فى صوت الآذان .. فى اللمه .. فى ضحكه الاطفال .. فى حضن امك .. فى نور الشمس لما بتشرق .. وفى دفاها لما بتغرب .. فى ضياء القمر .. فى نسمه هوا تصحصحك وانت قاعد مع اصحابك فى الحسين .. فى ابتسامه واحد عجوز قمت عشان يقعد مكانك فى المترو :)

فى الجاكت اللى بتحبه .. فى ريحه راحه البال اللى بتشمها مجرد دخولك بيتك .. فى أكلتك اللى بتحبها من ايد زوجتك .. فى شقاوة ابنك لما يخطف منك الريموت عشان عاوز يتفرج على سبيس تون .. فى فرحته وانت بتشترى ليه لبس العيد :)

فى شقاوه العصافير .. فى البحر لما يبعت موجه صغيره تزغزغ رجليك وانت نايم عالشط .. فى حماسك وانت طالع أول رحله للاهرامات .. فى غمزة خبيثه لأصحابك فى الفرح وبعدها العريس بقى يلمس سقف القاعه وينزل تانى :)

فى حكايات جدك او جدتك عن ايام زمان .. فى ريحه الدرة المشوى عالكورنيش لما تحب تعزم خطيبتك .. فى ضحكتك اللى من القلب بعد ما صاحبك شرب المقلب اللى عملته فيه .. فى صوت أبوك وهو بيقولك يابنى والله بكره هتفرج وهتبقى زى الفل :)

الحب موجود فى كل حاجه حواليك .. كل حكايه وكل تفصيله صغيره مليانه حب ودفا .. كل اللى عليك انك تغيّر نظرتك ليها :)

انظر بحب .. هتشوف وهتحس الحب :)


لـ
هيثم عزمي